പാഷനില്‍ നിന്ന് വിജയത്തിന്റെ ബ്രാന്‍ഡിലേക്ക്; ഓരോ ഫ്രെയിമിലും അത്ഭുതം തീര്‍ത്ത് ‘Stories By Anoy’
ഒരു ജോലി ഉപേക്ഷിച്ച് സ്വന്തം പാഷനെ പിന്തുടരുകയെന്നത് എളുപ്പമുള്ള തീരുമാനമല്ല. പ്രത്യേകിച്ച് സ്ഥിരവരുമാനമുള്ള ഒരു ജോലി വിട്ട്, മറ്റൊരു മേഖലയില്‍ സ്വന്തമായൊരു ഇടം കണ്ടെത്തുകയെന്നത് വലിയ ധൈര്യം ആവശ്യപ്പെടുന്ന കാര്യമാണ്. എന്നാല്‍ സ്വപ്‌നം വ്യക്തമാണെങ്കില്‍ വഴികളും പതിയെ തെളിയും. അത്തരമൊരു യാത്രയാണ് പ്രൊഫഷണല്‍ ഫോട്ടോഗ്രഫറും സംരംഭകനുമായ അനോയിയുടേത്.
2017 ല്‍ എഞ്ചിനീയറിങ് പഠനവും എംബിഎയും പൂര്‍ത്തിയാക്കിയ ശേഷം 2021 ല്‍ റിലയന്‍സിലെ മാനേജര്‍ ജോലി ഉപേക്ഷിച്ചാണ് അനോയ് തന്റെ പാഷന് പിന്നാലെ ഇറങ്ങിയത്. തുടക്കത്തില്‍ പോട്രെയ്റ്റ് ഫോട്ടോഗ്രഫിയും പള്ളിയുമായി ബന്ധപ്പെട്ട വീഡിയോഗ്രഫിയുമെല്ലാം ഏറ്റെടുത്തായിരുന്നു തുടക്കം. വലിയ സംവിധാനങ്ങളോ വലിയ ടീമോ ഇല്ലാതിരുന്ന കാലത്ത്, ഓരോ വര്‍ക്കും തന്റെ കഴിവ് തെളിയിക്കാനുള്ള അവസരമായാണ് അദ്ദേഹം കണ്ടത്.
സോഷ്യല്‍ മീഡിയയുടെ സാധ്യതകള്‍ തിരിച്ചറിഞ്ഞതും അനോയിയുടെ വളര്‍ച്ചയില്‍ നിര്‍ണായകമായി. ടിക്‌ടോക് സജീവമായിരുന്ന കാലത്ത് ഡിവോഷണല്‍ വീഡിയോകളും മറ്റ് കണ്ടന്റുകളുമൊരുക്കി മികച്ച റീച്ചാണ് അദ്ദേഹം നേടിയത്. പിന്നീട് യൂട്യൂബ് ചാനലിലേക്ക് എത്തിയപ്പോഴും ആ പ്രേക്ഷക പിന്തുണ നിലനിര്‍ത്താന്‍ സാധിച്ചു.
കോവിഡ് കാലത്ത് ലൈവ് സ്ട്രീമിങ്ങിലേക്ക് കടന്നതോടെ അനോയിയുടെ പ്രവര്‍ത്തനങ്ങള്‍ക്ക് പുതിയൊരു ദിശ ലഭിച്ചു. മരണച്ചടങ്ങുകളായാലും വിവാഹങ്ങളായാലും നേരിട്ട് പങ്കെടുക്കാന്‍ കഴിയാത്തവര്‍ക്ക് ചടങ്ങുകള്‍ തത്സമയം കാണാന്‍ സാധിക്കണമെന്ന ആശയത്തിലാണ് ലൈവ് സ്ട്രീമിങ് വിപുലീകരിച്ചത്. പിന്നീട് ഈ മേഖലയിലെ പ്രവര്‍ത്തനങ്ങള്‍ കൂടുതല്‍ വ്യാപിക്കുകയും വിവിധ മേഖലകളില്‍ നിന്നുള്ള പി.ആര്‍ വര്‍ക്കുകള്‍ ലഭിക്കുകയും ചെയ്തു.
പരസ്യങ്ങള്‍, ഷോര്‍ട്ട് ഫിലിമുകള്‍, മ്യൂസിക്കല്‍ ആല്‍ബങ്ങള്‍ തുടങ്ങിയ മേഖലകളിലും പ്രവര്‍ത്തിച്ച ശേഷമാണ് അനോയ് പ്രൊഫഷണല്‍ ഫോട്ടോഗ്രഫിയിലേക്കും വീഡിയോഗ്രഫിയിലേക്കും കൂടുതല്‍ ശ്രദ്ധ കേന്ദ്രീകരിക്കുന്നത്. വേഗതയ്‌ക്കൊപ്പം ഗുണമേന്മയും ഉറപ്പാക്കുകയെന്നതാണ് ‘Stories By Anoy’ യുടെ പ്രധാന പ്രത്യേകതകളിലൊന്ന്. ഫോട്ടോയും വീഡിയോയും എഡിറ്റിങ് പൂര്‍ത്തിയാക്കി ഒന്നര മണിക്കൂറിനുള്ളില്‍ ക്ലെയിന്റിന് ഔട്ട്പുട്ട് നല്‍കാന്‍ സാധിക്കുന്ന രീതിയിലാണ് പ്രവര്‍ത്തനം.
ഒരു ക്ലെയിന്റില്‍ നിന്ന് മറ്റൊരു ക്ലെയിന്റിലേക്ക് വളര്‍ന്നതാണ് അനോയിയുടെ ബിസിനസ് യാത്രയിലെ മറ്റൊരു പ്രത്യേകത. മികച്ച വര്‍ക്കുകളും ക്ലെയിന്റ് സംതൃപ്തിയും തന്നെയാണ് അടുത്ത അവസരങ്ങളിലേക്ക് വഴിതുറന്നത്. പ്രത്യേകിച്ച് വിവാഹ വീഡിയോകള്‍ക്ക് മികച്ച വ്യൂസും റീച്ചും നേടാന്‍ സാധിച്ചതോടെ കൂടുതല്‍ പേരിലേക്ക് ബ്രാന്‍ഡിന്റെ പേരെത്തി.
വെഡ്ഡിങ് മേഖലയില്‍ മാത്രം ഒതുങ്ങാതെ രാഷ്ട്രീയം, സ്‌കൂള്‍ പ്രോഗ്രാമുകള്‍, വിവിധ സാമൂഹിക പരിപാടികള്‍ തുടങ്ങി വ്യത്യസ്ത മേഖലകളിലേക്കും പ്രവര്‍ത്തനം വ്യാപിച്ചു. ഇന്ന് പി.എസ്.സി പോഡ്കാസ്റ്റുകള്‍ ഉള്‍പ്പെടെയുള്ള കണ്ടന്റ് പ്രൊഡക്ഷന്‍ വര്‍ക്കുകളും ഏറ്റെടുത്ത് ചെയ്യുന്നുണ്ട്. അതോടൊപ്പം ടൂര്‍ പാക്കേജുകള്‍, ഡിസൈനിങ്, പ്രിന്റിങ്, എഡിറ്റിങ് തുടങ്ങിയ സേവനങ്ങളും ഉള്‍പ്പെടുത്തി ഒരു സമഗ്ര ക്രിയേറ്റീവ് ബിസിനസ് എന്ന നിലയിലേക്കാണ് സംരംഭം വളര്‍ന്നത്.
സ്വന്തം വളര്‍ച്ചയ്‌ക്കൊപ്പം മറ്റുള്ളവര്‍ക്ക് കൂടി അവസരങ്ങള്‍ സൃഷ്ടിക്കാന്‍ കഴിഞ്ഞതാണ് അനോയ് തന്റെ സംരംഭത്തിന്റെ ഏറ്റവും വലിയ നേട്ടമായി കാണുന്നത്. ഇന്ന് നിരവധി പേര്‍ക്ക് ജോലി നല്‍കാനും വരുമാനമാര്‍ഗമൊരുക്കാനും അദ്ദേഹത്തിന് സാധിച്ചിട്ടുണ്ട്.
ഈ യാത്രയില്‍ പാര്‍ട്ണറായ ലിജോയുടെ പിന്തുണയും നിര്‍ണായകമാണ്. യു.എസിലും ബ്രാന്‍ഡിനെ വളര്‍ത്തിക്കൊണ്ടിരിക്കുന്ന ലിജോയോടൊപ്പം ഇന്ത്യയിലും ഇന്ത്യയ്ക്ക് പുറത്തുമായി നിരവധി വര്‍ക്കുകളാണ് ടീം ഏറ്റെടുത്ത് മുന്നേറുന്നത്. ഒരേ സ്വപ്‌നത്തെ വ്യത്യസ്ത ഇടങ്ങളില്‍ നിന്ന് വളര്‍ത്തിയെടുക്കുന്ന കൂട്ടായ്മ കൂടിയാണിത്.
ഇന്ന് ഒരു ചിത്രം കണ്ടാല്‍ അതിലെ വാട്ടര്‍ മാര്‍ക്ക് തന്നെ ആളുകള്‍ തിരിച്ചറിയുന്ന നിലയിലേക്ക് ‘Stories By Anoy’ വളര്‍ന്നുകഴിഞ്ഞു. എന്നാല്‍ ഈ ബ്രാന്‍ഡിന്റെ ലക്ഷ്യം അവിടെ അവസാനിക്കുന്നില്ല. Adams Advertising & Productions, Evan Holidays & Planners, Team Adams Officials, Stories By Anoy തുടങ്ങിയ സംരംഭങ്ങളെയെല്ലാം ഒരൊറ്റ കുടക്കീഴില്‍ കൊണ്ടുവന്ന് Team Adams Group ആയി വളര്‍ത്തുകയാണ് അനോയിയുടെ വലിയ സ്വപ്‌നം.
പാഷനെ പിന്തുടരാനെടുത്ത തീരുമാനത്തില്‍ നിന്നാണ് ഈ യാത്ര ആരംഭിച്ചത്. തുടക്കത്തിലെ വെല്ലുവിളികളെയും അനിശ്ചിതത്വങ്ങളെയും മറികടന്ന് സ്വന്തം കഴിവില്‍ വിശ്വസിച്ച് മുന്നേറിയപ്പോള്‍ ഓരോ വര്‍ക്കും അടുത്ത അവസരത്തിലേക്കുള്ള വാതിലായി. അതിന് കുടുംബത്തിന്റെ ഉറച്ച പിന്തുണയും കരുത്തായി. ഒരു ക്യാമറയും ഒരു പാഷനും കൈമുതലാക്കി തുടങ്ങിയ യാത്ര, സേവനങ്ങളുടെ വൈവിധ്യവും കൃത്യമായ പ്രവര്‍ത്തനവും വിശ്വാസവും ചേര്‍ത്ത് ഒരു ബ്രാന്‍ഡായി വളര്‍ന്ന കഥയാണിത്. ഓരോ സംരംഭത്തിലും സ്വന്തം വ്യക്തിമുദ്ര പതിപ്പിച്ചാണ് അനോയ് വളര്‍ന്നത്.
