നിക്ഷേപ പദ്ധതികളുമായി ബന്ധപ്പെട്ട ചര്‍ച്ചകള്‍: കീറ്റെക്‌സ് ഗ്രൂപ്പ് ഇന്ന് ഹൈദരാബാദിലേക്ക്
കൊച്ചി : നിക്ഷേപ പദ്ധതികളുടെ ചര്‍ച്ചയ്ക്കായി കീറ്റെക്‌സ് ഗ്രൂപ്പ് ഇന്ന് ഹൈദരാബാദിലേക്ക്. സംരംഭം തുടങ്ങാന്‍ വന്‍ ആനുകൂല്യങ്ങളാണ് തെലങ്കാന സര്‍ക്കാര്‍ വാഗ്ദാനം ചെയ്തിരിക്കുന്നത്. രാവിലെ പത്തരയോടെയാകും സാബു ജേക്കബ് യാത്ര തിരിക്കുക. തെലങ്കാന സര്‍ക്കാര്‍ അയച്ച സ്വകാര്യ ജെറ്റ് വിമാനത്തിലാണ് യാത്ര. അതിന് മുന്‍പ് മാദ്ധ്യമങ്ങളെ കാണുമെന്നും അറിയിച്ചിട്ടുണ്ട്.
വ്യവസായ മന്ത്രി കെടി രാമറാവുവുമായും മറ്റ് ഉന്നത ഉദ്യോഗസ്ഥരുമായും കിറ്റെക്സ് എംഡി ടെലിഫോണില്‍ സംസാരിച്ചിരുന്നു. അദ്ദേഹത്തിന്റെ ക്ഷണം സ്വീകരിച്ചാണ് തെലങ്കാനയിലേയ്ക്ക് പോകുന്നത് എന്നും കമ്പനി വ്യക്തമാക്കിയിരുന്നു.
കിറ്റെക്സ് ഗ്രൂപ്പ് എംഡി സാബു ജേക്കബിനൊപ്പം ഡയറക്ടര്‍മാരായ കെഎല്‍വി നാരായണന്‍, ബെന്നി ജോസഫ്, ഓപ്പറേഷന്‍സിന്റെ വൈസ് പ്രസിഡന്റ് ഹര്‍കിഷന്‍ സിങ് സോധി, സിഎഫ്ഒ ബോബി മൈക്കിള്‍, ജനറല്‍ മാനേജര്‍ സജി കുര്യന്‍ തുടങ്ങിയ ആറംഗ സംഘമാണ് കൊച്ചിയില്‍ നിന്ന് തിരിക്കുന്നത്.
