ചര്‍മ്മ സംരക്ഷണ വിഭാഗത്തില്‍ ഏഴ് പുതിയ സോപ്പുകള്‍ ഇറക്കി കെപി നമ്പൂതിരീസ്
കേരളത്തിലെ പ്രമുഖ ആയുര്‍വേദ ഉല്‍പ്പന്നങ്ങളുടെ നിര്‍മ്മാതാവായ കെപി നമ്പൂതിരീസ് ചര്‍മ സംരക്ഷണ വിഭാഗത്തില്‍ ഏഴുതരം സോപ്പുകള്‍ വിപണിയിലിറക്കി. തുളസി,ആര്യവേപ്പ്,ചന്ദനം, മഞ്ഞള്‍, വെറ്റിവര്‍,ദശപുഷ്പം എന്നിവയ്ക്ക് പുറമെ രണ്ട് ഗ്ലിസറിന്‍ സോപ്പുകളും കമ്പനി പുറത്തിറക്കിയിട്ടുണ്ട്.
75 ഗ്രാം, 100 ഗ്രാം എന്നീ തൂക്കത്തില്‍ മികച്ച പായ്ക്കറ്റുകളിലാണ് സോപ്പുകള്‍ വിപണിയില്‍ ലഭ്യമാവുന്നത്. 100 ഗ്രാമിന്റെ3 നോണ്‍ ഗ്ലിസറിന്‍ സോപ്പ് വാങ്ങിയാല്‍ ഒരു സോപ്പ് സൗജന്യമായും ഗ്ലിസറിന്‍ സോപ്പുകള്‍ മൂന്നെണ്ണം വാങ്ങുമ്പോള്‍ 15 രൂപയുടെ ഇളവും ലഭിക്കും. കെപി നമ്പൂതിരീസ് പുറത്തിറക്കിയ പുതിയ സോപ്പുകള്‍ എല്ലാ സൂപ്പര്‍മാര്‍ക്കറ്റുകളിലും സപ്ലൈകോ ഔട്ട്ലെറ്റുകളിലും മറ്റു കടകളിലും ഓണ്‍ലൈനിലും ലഭ്യമാകും.
അത്യാധുനിക ഗവേഷണ സൗകര്യങ്ങളുള്ള കമ്പനിയുടെ ലാബില്‍ സസ്യയെണ്ണ ഉപയോഗിച്ചാണ് സോപ്പുകള്‍ വികസിപ്പിച്ചെടുത്തതെന്ന് കെപി നമ്പൂതിരീസ് എംഡി കെ ഭവദാസന്‍ അറിയിച്ചു. സോപ്പുകള്‍ എല്ലാം ഗ്രേഡ് വണ്‍ സോപ്പുകള്‍ ആണെന്നും ഇതില്‍ പാരബെന്നോ ദോഷകരമായ മറ്റ് രാസവസ്തുക്കളും ഉപയോഗിക്കുന്നില്ലെന്നും അദ്ദേഹം വ്യക്തമാക്കി.
പുതിയ ഉല്‍പന്നങ്ങളിലൂടെ ചര്‍മസംരക്ഷണ വിപണിയില്‍ ശക്തമായ സ്ഥാനമുറപ്പിക്കാന്‍ കഴിയുമെന്ന് പ്രതീക്ഷിക്കുന്നുവെന്നും ഭവദാസന്‍ വ്യക്തമാക്കി.
